(سجان من غوانتانامو )

 

  (سجان من غوانتانامو )

مسرح الحكاية هو معتقل غوانتانامو هاد المعتقل هو سجن خدا اسمو من القاعدة  الكوبية للي كاينه ف خليج غوانتانامو  على الاراضي الكوبية .. وللي تنازلات عليها كوبا للولايات المتحدة عام 1903 كاعتلراف ب جميل تيودور روزفلت للي ساعد كوبا ف حربها ضد اسبانيا..

الولايات المتحدة الامريكية كرات هاد القاعدة من  كوبا مقابل مبلغ سنوي  واستعملاتها كمعتقل ف 11يناير2002 بعد هجمات 11سبتمبر...

ف داك الوقت امريكا  اعتقلات 779 سجين وتم هاد الاعتقال ف حق ناس من جنسيات مختلفة مابينهم الافغان ,السعوديين اليمنيين الباكستانيين المغاربة والجزائريين هؤلاء تم ف حقهم  واحد النوع من الاعتقال  تيسميوه الاعتقال الإداري وهو اعتقال تيكون بأمر إداري و بلا ما يحسم فيه القضاء ، ما تتكون لا لائحة اتهام ولا محاكمة.. تيكون بناء على ملفات سرية أو بسبب عدم وجود  أدلة ف الاصل أو نقص الأدلة ..

كانت السلطات  كلما شكت ف شي حد تتعتقلو تحت دريعة  الحرب على الارهاب و حماية امريكا وهاد التهمة لقات قبول كبير ف صفوف الامريكان للي اعتبروها رد اعتبار لامريكا من الاعتداء علىها

معتقل غوانتانامو هو  المعتقل الأكثر عنفا ودموية ف تاريخ السجون ..ف هاد المعتقل أمريكا تتخدم أكثر الوسائل خشونة وقسوة ضد السجناء للي تيخضعوا  للعنف الجسدي والعنف المعنوي ..السجانين متدربين على انتزاع الاعترافات من أفواه المعتقلين، شي للي تيمكنهم من اقتراف جرائم مثالية ف حقهم ا بلا ما يخليوا أثر على الأجساد  ..وهادا علاش سجن تعرف بالسمعة السيئة  وارتبط الاسم ديالو ف اذهان السجناء والرأي العام  بأنه السجن الأكثر احتقارا لكرامة الانسان ..  

عدد السجناء بدا تينقص ف من 779ديال السجناء للي تعتاقلو سنة 2002 بقى ف سنة 2013 160 معتقل وف سنة 2017   41معتقل وف 2018  40معتقل.. لكن مع كل اسف حتى الناس للي تم الافراج عليهم من غوانتانامو لما التاحقو ب اوطانهم لقاو هناك غوانتاناموا صغير وعلى الطريقة الخاصة ب كل بلد  

السجناء للي تم ترحيلهم ل بلدانهم او بلدان اخرى تعرضو ل سوء المعاملة و للمحاكمات الصورية والتعذيب..

سجن غوانتانامو  ارتبط ب  حكاية اليوم للي تدور حول شاب امريكي  اسمو هولدبروكس للي  تيقوم ب مهمة حارس  جاتو  اوامر من القيادة باش يمارس اشد انواع التعذيب على نزلاء  غوانتانامو ..  

هولدبروكس  قنعوه انه امام  ارهابيين تحت نفوذ اسامة بلادن , وانهم يلا وجدو فرصة للتخلص من السجانين ماغاديش يترددو..

بناء على هاد الافكار للي تزرعات ف عقولهم  ,السجانين صبحات عندهم عداوات شخصية مع هاد السجناء ..ولكن هاد السجان هولدبروكس ب فضل الفطنة ديالو ودقة الملاحظه وهو تيراقب سلوك السجناء المسلمين  للي كان كلما تامل وجوههم رغم التعذيب للي تيتمارس عليهم ورغم الغربة والاحساس بالظلم  تيشوفهم من اطيب خلق الله, صبورين بشوشين  ..وفوق هذا كله كانو تيخبروه انهم مسامحينو على كل ما دار ف حقهم 

ف ديك الظروف القاسية ,كان هولدبروكس تيتعجب وتيتساءل منين جابو هاد الناس ذاك الصبر وذاك الابتسامة وديك  الثقة ف النفس والتمسك بالايمان حيت كان تيسمعهم تيكترو من قول الحمد لله ؟ و متحانين مع بعضهم وتيواسيو بعضهم  وما تيتخلاوش عل الصلاة والصيام ,كان صوتهم وهما تيقراو القران تيحرك مشاعر  جمييييييلة ف اعماقه.. , ولهذا هولدبروكس بقى يوم على يوم  تيشعر ب سعادة ماتيعرفش كفاش يفسرها كلما لقى نفسو تيتحاور مع سجين من دوك السجناء  وكان تيشعر ان شي رابط خفي تيجمع بينهم  ولكن ماتيعرفش اش هو  ولما تيرجع ل صحابو من الامريكان او للمساجين الاخرين كان تيشعر شعور عادي مافيه حتى بهجة وبقى على هاذ الحال يوم على يوم تيزيد يحبهم ويعجب ب فكرهم ونظرتهم للحياة حتى ل واحد النهار  و بقدرة قادر تغيرات معتقدات هولدبروكس من الالحاد ل الاسلام  ..

ولما علن هولدبروكس على اسلامه صحيفة نيوزويك الأمريكية  كانت السباقة ل نشر الخبر و قالت بأن هاد  المجندي كان تيعمل حارس ف معتقل غوانتانامو و قضى فيه مدة 6أشهر ضمن إحدى سرايا الشرطة العسكرية , تقرب من المعتقل المغربي للي كانو تيسميوه الجنيرال وللي اسمو الحقيقي أحمد الراشدي كانت هاديك  فترة تحول كبيرة ف حياة هولبروكس

الجنيرال كانت تدور بينه وبين هولدبروكس نقاشات طويله حول الأديان  خلالها كان كل واحد فيهم تيمتحن قدرة الاقناع للي عندو وب طريقة منهجية وحضارية . هولدبروكس لقى راسو مع انسان متمكن من ثقافتو وتدينو ووسائل الاقناع للي عندو فعالة  هذا شجعه عل الطلاع عن قرب على دين ولغة هاد السجين ..

 كما تنعرفو جميع ,الامريكان عندهم نهم د القراءة والكتاب هو الرفيق الصادق للي تيرافقهم ف كل مكان وحتى ف  دورات المياه اعزكم الله  ,من هاد الباب تمكن هولدبروكس يدخل ل  عالم هاد المساجين ول تاريخهم ودينهم وعاداتهم ولغتهم  و لقى راسو حط يدو على كنز لا يفنى  من بعد ما تمكن  من المفتاح الاساسي  للي هو اللغة العربية ... داك الساعة  لمس ف راسو انه  تيتذوق طعم  هاد النوع من الكتب  وهاذا قصر الفترة للي مكناته من التعمق ف الاسلام والحضارة الاسلامية وف التاريخ الاسلامي 

هولدبروكس نطق بالشهادتين عن قتناع شخصي على أرضية المعسكر وصبح مسلم حيت تعرف عل الاسلام الحقيقي من خلال السلوك المثالي لمسلمي المعتقل و من خلال الصديق الصدوق الكتاب  للي صحح ليه الافكار المغلوطة عل الاسلام والمسلمين  

صبح الكل تيسميه الحارس الطيب بينما زملاءه الامريكان كانوا تيشوفوا فيه انسان خائن .. سلوك  السجين المغربي  أحمد الراشدي كان غ نموذج من نماذج اخرى اكثر روعة من ابناء هاد الدين للي عمرو قلب هولدبروكس وخلاوه يترمى ف حضنهم..  

التأزر والتواد والتحاب للي كان بين السجناء المسلمين خلاه يتعجب  ويتساءل عل السر  ف هاد السلوك الفريد من نوعه ,كان تيشوف ف هاذ السلوك نموذج حضاري  ماتيشبه لو حتى نموذج ف الغرب عامة وف امريكا خاصة ..

 هولدبروكس فهم ان روابط العقيدة هي السر ف ذاك التلاحم للي بين داك لمسلمين .. وفهم ان روابط العقيدة اقوى وامتن من روابط الدم والقرابة ..عجبو بزاف هاذ النموذج الحضاري وزاد قتانع ب عظمة هاد الناس  وعظمة هاد الدين  وهادا علاش تحول هاد الشاب من حياة المجون والخمر..و ...و و .. ل التقوى والصلاة لما اعتنق الاسلام .

هولدبروكس سمى نفسه  مصطفى عبد الله..و غادر الخدمة عام 2005 .و لكن بقى ضميره تيعذبو كلما تذكر انه ف يوم من الايام كان سجان تيعذب ناس أغلبهم  ابرياء .. قربه من خوتو لمسلمين  خلاه يطلب  منهم السماح  وهما تقبلو اعتذارو   ..باش يرتاح ضميرو واضب ع المسجد  و قراءة القران والسيرة النبوية ووسع علاقاته مع المسلمين حتى صبح واحد منهم ..