(من هذا الذي دفعه الحسد الى قتل أسرة كاملة بدم بارد؟)

 (من هذا الذي دفعه الحسد  الى قتل أسرة كاملة بدم بارد؟)

  عائلة هاينز عائلة  امريكية تتسكن ف منطقة Lancastere   تعرضات ل جريمة قتل  وحشية ف12 ماي 2007  مع الفجر    

هاد الجريمة مشى ضحيتها ثلاثة د الافراد :الاب طوم 50سنة  مدير شركة ل بيع التجهيزات الصناعية للي تعرض ل طعنات قاتلة على مستوى الصدر ..,

الام ليزا 45سنة مدرسة  تلقات طعنات  مميتة  ف كل انحاء الجسم

 الابن kivin 16سنة كان  طالب بارع في لعبة الشطرنج ..نابغة في الرياضيات.. بطل فريق الكويز بول علاقاتو محدودة ومن المستبعد يكونو عندو اصدقاء تيتعاطاو للممنوعات   ..

 kivin   كان الوحيد للي تعرض ل قتل اكثر وحشية  حيت تطعن 50 طعنة ف الوجه ,الظهر ,البطن . الاطراف .. وكثر من هادا  تم تقطيع  الحنجرة ديالو ب وحشية ..

الدم  كان ف الغرفة ديالو وف ممرات البيت : عل الارض على الجدران على الملابس وهذا اعطا للمحققين فكرة على ان Kevin قاوم القاتل او القتلة المحتملين وما استسلمش للموت ب سهولة..

 ولكن , وهذا هو المهم :رجال الامن  ما وجدو ف مسرح الجريمة ولا بصمة  و من هنا جات  صعوبة  تحديد هوية القاتل او القتلة ..  

عائلة هاينز عندهم بنت واحدة اسمها  maggui عشرين سنة نجات  من الموت ب اعجوبة  ... حيت ف الوقت للي صوت خوها  للي تيتالم من طعنات القاتل  كان مسموع هي فاقت من انعاس دخلات ل بيت الوالدين ولقات امها مطعونة ولكن باقة حية وطلبات منها تخرج لطلب المساعدة..  خرجات هي تطلب النجدة وبلا مايشوفها المجرم. ولا تشوفو.

لما جاو البوليس كانت عائلتها ماتت والمجرم هرب  ..

لكن ول سوء حظ ماغي ,تركيز المحققين كله صبح  عليها حيت حضرات للجريمة , وما كانتش من الضحايا  ,  الابنة تتبقى ف عين المحققين المتهمة الاولى حتى يتبت العكس ..

 خلال التحقيق , مع MAGGIE  المحققين تعجبو كفاش فلتات  وحدها  من مصير  عائلتها  ؟ ملامحها الهادئة ورد فعلها للي تيعطي احساس بلامبالاة خلاهم يشكو فيها اكثر

MAGGIE اكدات للمحققين انها  ما شافت حتى حد والا لكانت حتى هي ف عداد الموتى  و انها هربات من البيت و تاصلات بالجيران وهكدا تم اعلام الامن د المنطقة ..

خبراء الطب الشرعي رفعو البصمات ب دقة متناهية ولكن ما وجدو  حتى بصمة  وهادا جعلهم يظنو ان الجاني او الجناة كانو لابسين قفازات

ولكن وبقدرة قادر  , استاطع فريق البحث يلقى دليل ف ساحة الجريمة وكان على شكل اثار اقدام  يعني السوميلا د الصباط  للي زطمات  ف الدم وكل ما تحركات تتخلي اثار سواء على الكص او الزرابي  وهي تترجع ل نفس الشخص وهو واحد ماشي زوج او اكثر..

من خلال الطريق للي مشات فيه الخطى , فريق البحث قدر يفهم انه من بعد مقتل Kevin القاتل رجع ل غرفة lisa  الام للي كانت رغم الطعنات للي تلقاتها مازالا حية وطعنها طعنة اخيرة ف الحنجرة ..

تتبعو بصمات الاقدام  ولقاوهم مشاو مرة اخرى حتى  الحمام للي ف الطابق الثاني و هناك المحققين استخدمو مادة الليمينول  وهي مادة تتستعمل ف تحقيقات جرائم القتل  تترش ف اماكن  معينة  .وف حالة وجود دماء تتعطي لون ازرق مضي ء .. ب فضل الليمينول  قدرو يكتشفو وجود اثار دم ف المغسلة le lavabo...

انا ف الحقيقة صدمني  هاذ القاتل خدا وقتو باش يدور بين غرف المنزل  ويقتل الاحياء ويرجع ل  تصفية  الضحايا للي مابين الحياة والموت ويصعد للطابق الثاني   يغسل يديه والسكين من دم الضحايا  ب كل برودة دم ؟  

المحققين بداو تيقلبو كفاش  دخل القاتل ل بيت عائلة    هاينز      مالقاو حتى  علامة تدل على ان شي باب او نافذة   مكسرين بقاو حايرين .. واحد اللحظة وهما يتذكرو عادة اهل  الحي ..فالناس ف هاد الحي اعتادو الامان والطمأنينة ..وعليه كانو اغلبيتهم ما تيسدوش البيبان بالسوارت..  هادي نقطة 

ونقطة اخرى  تبين ان المسالة ما عندها علاقة بالسرقة حيت حتى حاجة ما ناقصة من الدار و عليه فالهدف من داك الزيارة كان بدون شك ب هدف  القتل

الفريق ما توقفش عل البحث عل المزيد من الادلة وهاد المرة وجد  خلف البيت  دليل اخر كسكيطة بيزبول عليها شريط لاصق   اثار دم وشي خصلات د شعر داك الساعة فرحو حيت مابين يديهم ادلة غ تمكنهم من قراءة adn د القاتل وللي غ تمكنهم من اغلاق القضية..عرضو نتائج البحت على قاعدة بيانات المجرمين لكن ما وجدو حتى تشابه بينها  ..ف هاد الحالة الباحثين احتفضو ب adn للي لقاوا ب غرض  مقارنتها مع مشتبه بهم ف حالة ما يلا  وجودهم مستقبلا..

عائلة   هاينز  بحال جميع العائلات للي تعرضات للقتل  كانت حديث الساعة  د وسائل الاعلام  الجيران وزملاء العمل والاقارب ...

كلشي تيشهد ان هاد العائلة كانت  نموذج للعائلة المتواضعة المحبة الكل كان  تيبادلهم مشاعر الحب والاحترام .. وحتى حد ما فهم علاش كانت عرضة ل هاد النهائة الماساوية؟

  البوليس كانو تيتساءلو بزاف علاش Kevin هو الوحيد للي تطعن ب اكبر عدد من الطعنات وبداو تيتساءلو واش المسالة فيها تصفية حساب معاه؟  او فقط لانه تعرف عل القاتل و قاومو ولهذا بغى يقتلو باش ما يعقلش عليه ويشهد فيه؟ هاذي كلها كانت تساؤلات معلقة والاجوبة ديالها ب دون شك غ تكون ف صالح القضية

المحققين مشاو للمحيط القريب ديال كفين وبحثو ف نوعية الاصدقاء ديالو وف سلوكه داخل المؤسسة التعليمية ..لاحظو ان علاقاتو قليلة ومتواضعة   كان عندو زوج  د الاصدقاء فقط للي هما benjamin up et alec kreider  حتى هما حققوا معاهم ولكن ما وصلو ل والو ..و ف الاخير المحققين بداو تيشكو ان القاتل ربما كان من حساد عائلة هاينز للي كانت ناجحة  ماديا وعائليا..  

سكان  الحي  للي كانو تيعرفو عائلة هاينز ومدى طيبتها وتواضعها واخلاقها ,دخلهم الرعب وبدات تيشوفو راسهم امام مختل مستعد للضرب ف أي وقت ..

البوليس بداو تيقتنعو ان القاتل من  نوع القتلة للي ما تيحتاجوش ل اسباب باش يقتلو وانهم ف أي لحظة ممكن يهجمو ويخلفو ضحايا وهاد النوع من القتلة تيتسماو ف عرف القانون المعمول بها ف الغرب :القتلة المتسلسلين

وللمزيد من البحث تم التواصل مابين بوليس  المناطق المختلفة للمدينة  او الدولة ككل ..  

تواصلو مع بعضهم ف اطار التعاون وبحثو على حوادث متشابهة تمت عن طريق السلاح الابيض ف حق عائلة كاملة

النتائج كانت مبهرة حيت قالو انه  خلال-6 اشهر الاخيرة تسجلات 4 د   الحوادث  مشابهة ل حادث عائلة هاينز ف نيويورك  فلوريدا كالفورنيا  البوليس تيشوفو انه كاين احتمال يكون الفاعل واحد  وهو قاتل متنقل

ولهذا البوليس عل الصعيد الوطني وسعو دائرة البحث .. وف هاد الاطار واحد البوليسي وهو تيقوم ب مراقبة روتينية في الطريق وقف  سيارة  حمرا جايا من بنسلفانيا وغاديا ل فلوريدا  وهاد بنسلفانيا هي المنطقة للي فيها  مدينة  لنكاستر   للي وقعات فيها مجزرة عائلة هاينز ..  

السيارة فيها زوج د الاشخاص  ..طلب  البوليسي من السائق وثائق السيارة وداك الساعة لاحظ وجود جروح كثيرة على ظهر يدو  و لقى عندو موس د الصيد وشي بركة د المارخوانا وكان هاذا كافي باش يخليهم يخضعو ل تحقيق..  

 خلال التحقيق الشبان ب زوج  اعتارفو انهم قتاحمو بيت وقتلو صحابو  هاد الخبر  زعزع المحققين  ..حيت عطاو تفاصيل دقيقة  تيعرفوها رجال الامن

المحققين  ديال لونكستر ظنو انهم اخيرا عندهم اعترافات  موثوق بها وهذا غيمكنهم من اغلاق التحقيق ف قضية ال هاينز 

ولكن رغم افادة صحاب الشاحنة , كان اول حاجة بغاو  البوليس يدرسوها هي السميلا د الصباط د المتهمين .. عرضوها على مختبر د الطب الشرعي  ولكن مع كامل الاسف تصابو ب خيبة امل لما ما كانوش تيشبهو للسوميلا للي  تغمسات ف دم الضحايا وطبعات على الزرابي والارضية د عائلة هاينز  .. 

خلال البحت بان لهم ان اصحاب السيارة كذبو عليهم  حيت لما وقفو عل الصح   قدمو حجة غياب  قوية يوم 12ماي وهاذا هو النهار  للي تقتلت  فيه عائلة هاينز .. ومع ذلك المحققين  ما ستسلموش  وستغلو طرق  اخرى باش يتبتو او ينفيو تورط الشابين 

استخدمو  الطب الشرعي  للي داز ل مرحلة اخرى من التحقيق وهي مرحلة مقارنة  adnللي لقاو على الكاسكيطة و اثار الدم وخصلات شعر  مع adn د المشتبه بهم ب زوج  

والنتيجة الصادمة مرة اخرى هي ان الطب الشرعي بين اختلاف مابين adn للي لقاوها على الكاسكيطة للي تلقات خلف بيت عائلة هاينز وadn د الشابين ...

وانا من جهتي للي صدمني هو اعتراف هاد زوج  د لحلاقم بارتكابهم جريمة  ماعندهم بها حتى صلة ..ف نظركم شنو الدافع للي ممكن يخليهم يقومو ب هاد المجازفة بل هاد الحماقة؟

من بعد زوج د الاسابيع د البحت المضني كانت المكالمات الهاتفية د المواطنين مغرقاهم  حتى جاتهم مكالمة تتبشر بالخير وكانت غير متوقعة من  شخص عندو علاقة ب مركز احتجاز المراهقين قال لهم ان شاب  قاصر اسمو انجيلو عندو معلومات مفيدة ف موضوع عائلة هاينز

المراهق خبر المحقق   ان واحد من صحابو  اسمو فيكتور حكى لو  قصتو مع ديك العائلة وعطاه تفاصيل دقيقة  على الجريمة   وفوق هاد شي وراه اداة الجريمة وهي موس فيه الدم   

المحققين مع التفاصيل للي توصلو لها من الشاب صدقو ان صاحبو هو القاتل وبغاو يزيدو يتأكدو من صدق هاد الشاب وعليه, قامو ب تتبيت مكرفون على الملابس د انجلو وخلاوه يتلاقى مع فيكتور لاربعة ايام متابعة ولكن فكتور ما عترف ب حتى حاجة   ..

المحللين من بعد هاد المحاولات بان لهم ان انجلو  غ اختارع فكرة قتل عائلة هاينز من طرف صاحبو  ,, هاذاك لمصرفق ف للخر اعترف لهم انو غ كذب عليهم ب هاد الشهادة ف حق صاحبو انجلو وكان الهدف ديالو هو يتبت التهمة على صاحبو  وهو يعتبروه شاهد ويخرجوه من السجن.. ياعبقري اوا ها الصحبة ولا فلا ههههه

المحللين  مساكن ضيعو ف هاد الاطار   بزاف د الوقت مع ناس كذبو عليهم ل درجة انهم كانو تيقضيو 18 حتى ل 20ساعة ف النهار ف  التحريات واش كتصورو مدى الضغط والتعب للي تعرضو لو بينما النتائج كانت سلبية ؟

ف الحي للي وقعات فيه الجريمة كلشي ولا خايف من كلشي ل درجة ان الجيران ولاو تيتساءلو واش فلان للي تنعرفوه هادي سنين  هو هذا للي على بالنا  وعايش معانا؟ ولا هو شخص مختلف ف حقيقته ..وهاكا صبحو الناس تيشكو ف  بعضهم الى اشعار اخر

رجال الامن  من جهتهم ,ومن كثرة ما تيعرفو  مكانة عائلة هاينز عند اصحاب الحي ومدى الحب والتقدير للي بينهم  ما قدوش يديرو كاشف الكذب ل حتى حد؟ وخرجو ب خلاصة انهم ما عندهمش مشتبه به..  وبقات مجموعة د الاسئلة  تطرح نفسها ب الحاح على المحللين ورجال الامن؟ :

مثلا :كانو تيتساءلوا  علاش ماغي  الابنة العشرينية نجات من القتل  على الرغم من انها كانت ف نفس البيت و كان ممكن تلقى نفس المصير؟

علاش القاتل خذا الاحتياط ولبس الليكات و طلع  حتى للطابق الثاني باش ينزعهم  ويغسل السكين من دم الضحايا وما خداش وقت باش ينظف اثار الحداء اللي ملطخ بالدم وللي ترسمات  اثارو عل الارضية والزرابي؟

علاش هادا للي اقتحم بيت ال هاينز ماسرق حتى حاجة من النفائس للي ف البيت؟

واش القاتل تيعرف هاذ العائلة ؟ ف من خلال سلوك القاتل   تكونت لذى المحققين قناعة بان القاتل تيعرف عائلة هاينز  وتيعرف كل  ركن  من اركان المنزل؟

واش القاتل حاقد على عائلة هاينز ؟ المحللين  تكونت عندهم ايضا فكرة على ان القاتل كان حاقد عليهم    وذلك من خلال الطريقة الوحشية للي قتلهم بها, وخاصة طريقة قتل الابن كفين هاديك  الطريقة الوحشية للي تقتل بها خلات المحققين يظنو ان القاتل عندو حساب شخصي معاه ..وأن هذا للي قتلهم تيعرف ان عائلة هاينز تتخلي الباب مفتوح ولهذا استغل هاد العادة ودخل ونفذ جريمتو .

واش القاتل فرد من سكان الحي؟لان للي قتلهم ,عرف طريقو للدخول والخروج  بلا ما يثير الانتباه ..

مرات اسابيع بدون ما يحطو المحققين يدهم على حتى خيط جديد ب خصوص جريمة عائلة هاينز  

ولكن ,ف يوم من الايام  تلقى  واحد المحقق  مكالمة  من شرطي فتحات باب الامل من جديد ف العثور على القاتل وهادشي كان  ف 7juin ف 12د الليل المكالمة خبراتو ان مراهق  من ولاد الحي  تيهدد بالانتحار وهاد المراهق غ تعجبو يلا عرفتو شكون هو ; هو  alek krayder  اعز صديق ل كفين  كانو بحال توام وكان محبب من طرف عائلة هاينز ودائما ف البيت مع ولدهم ...

المحقق بدا تيشوف ان مقتل كفين بدا الاثر ديالو تيبان عل محيط  عائلة هاينز   ..  من بعد مايقرب من ربعا د الاسابيع و اليك عايش ضغط وساكت حتى ل واحد نهار خبر صديقتو انه عندو مسدس وقال لها يلا ما عاوداتش  تشاوفات معاه غ ي نتحر .. الصديقة للي رعبها الحديث د اليك خبرات عمتها بالواقعة وهي ب دورها اتصلات بالبوليس  .. ف رمشة عين وصلو المحققين ل بيت اليك

و  بدا تيسول اليك علاش باغي ينتحر  وباغي يلحق الاذى ب نفسو؟ جاوبو اليك ب واحد الجواب صادم قال لو ان هاد العالم قبيح وكله ناس قباح ؟ المحقق ما استغربش بزاف ب  تهديد اليك بالانتحار خاصة لما عرف ان  اليك عندو حالة نفسية غير مستقرة ..

ام اليك اتفقات مع المحققين باش ولدها يتوضع ف وحدة للعلاج النفسي باش يقيمو حالتو النفسية  ف الوقت للي عمة صديقتو  رفضت رفض نهائي اي اتصال بين اليك وبنت خوها. لما زاروه والديه خبروه ب قرار عمة صديقتو  وطلبو منه مايعاودش يشوفها... وكان هاد الامر هو النقطة للي فيضات كاس اليك وف داك الوقت بالضبط اليك فجر ف وجه والديه ورجال الامن والمحقق قنبلة من خلال   تصريح  ماكانش عل البال  ولا منتظر  من واحد بحال اليك: خبرهم انه هو للي قتل عائلة هاينز ..

واش كتصورو الصدمة  والهلع للي شعرو بها الوالدين وخيبة الامل للي حسو بها المحققين ؟ ف بداية الاعتراف الكل ظن ان اليك تفوه ب ذاك الخبر غ باش ينتاقم من والديه  ب سبب حالة الانفصال للي معيشينو فيها ب سبب الطلاق ولكن مع التعمق ف التحقيق لا حظو المحققين ان المسالة اعمق من مجرد رغبة ف للانتقام من الوالدين :حديث اليك  وهو تيعترف بجريمته كان دقيق للغاية  خبر والديه انه لبس لباس اسود وغطى اللوgo د الكاسكيطة د البيزبول ب شريط لاصق وضوى طريقه ب واحد لاطوغش او بريكة وخدا معاه موس كبير و دخل ب سهولة للبيت حيت عارف ان ال هاينز تيخليو باب اكراج مفتوح ..

دخل ل غرفة الوالدين  وضرب الاب والام اولا ف صدورهم ثم دخل للغرفة د كفين  و طعنو طعنات كثييرة ..  كفين قاومو ب قوة ل درجة انو خرج من الغرفة ديالو وتشابك معاه ف الكولوار

ماggi سمعات لغوات والانين د خوها  تسلتات ودخلات ل غرفة الوالدين لقات امها مجروحة  شجعاتها تقلب على النجدة  

غ هي خرجات  تخبر الحيران داك الساعة اليك  لما انتهى من قتل كفين   رجع ل غرفة الوالدين لقى ليزا مازالا حية و عاود طعنها ف الحنجرة وقتلها  ..ماغي نجات من اليك حيت ظن انها ما رجعاتش من الجامعة داك لليلة  .. والا كانت غ تكون هي الضحية الرابعة  ف الحقيقة ما عرفتش نجاة ماغي من الموت واش من حسن حظها ولا من سوء حظها  .. افراد عائلتها ماتو وغ تبقى وحيدة  مع هاذ الذكرى الاليمة

والدين اليك بغاو يحماقو ما فهمو والو مستحيل يكون ولدهم هو المجرم و شكون قتل  ؟عائلة اعز صديق.؟ لكن اليك ما خلا ل حتى حد ادنى شك ف انه هو الفاعل  من خلال اعترافو الصريح والاعتراف كما يقال سيد الادلة

وثيقة توقيف تحررات عل الفور ف حق اليك .. المحققين وضعو اليد على السكين للي مازال تيحمل دم القتلى ,الليgات حتى هما عامرين بالدم, الحذاء للي حتى هو فيه اثارالدم  وللي بصمات السوميلا ديالو تيشبهو ل بصمات الحذاء للي ترسمات عل الارض والزربية وحذاء اليك عندو نفس الرقم مع بصمات الحذاء للي لقاو ف مكان الجريمة..  

ل مزيد من التدقيق ,الحذاء والسكين والليكات كلهم ترسلو لمختبر الطب الشرعي من اجل مقارنة adn

الحقيقة الصادمة كانت هي ان adn د كفين و اليك  موجودين على كل داك لحويجات للي خضعوها للدراسة ف المختبر 

بقات واحد المسالة ..المحققين خلال البحث عن ادلة ف غرفة اليك لقاو واحد لارمواغ  فيه الملابس ديالو وتحت داك الملابس موجودة واحد الاجوندا فيها ورقة تكتبات مباشرة من بعد جريمة القتل :

اليك كتب فيها :اليكسندر تولد يوم 12ماي 2007  ف ثلاتة ونص د الصبح..  

اليك تيوصف راسو ف ديك الصفحة بانه صبح رجل جديد قوي  اسمو الكسندر  (اليك هو اختصار لاسم الكسندر )تيوصف راسو بانو فخور ب كونو قدر يرتاكب افعالو الشنيعة وانه قدر يعترف بها  وتيحس ب راسو قدر يقتحم مرحلة جديدة ف التطور ديالو..

ف داك الجورنال الانتيم للي كتب اليك قدرو المحققين يقراو جمل بحال ):تنكره الناس للي تيمرضوني.. (

 ف جمل اخرى المراهق تيشرح : )ماعرفتش واش الله هو للي بغاني نحس ب هاد الدرجة من الكره ؟ ولكن الامور صبحات غير متحملة ف الاونة الاخيرة (

واحد الدكتور ف البسيكولوجي ف  نيويورك  دار اطلالة على هاد الجورنال أنتيم د اليك .. من خلال قراءتو ل كتابات اليك بان لو انو ممكن يكون قام بكل تلك الافعال الشنيعة ب سبب الحسد  تجاه صديقه كفين لان عائلة كفين كانت تتعيش اجمل عيشة وكانو متحابين  

اليك ماتحملش يشوف عائلة كفين سعيدة بينما عائلتو تتخبط ف ويلات الطلاق وهاد شي للي  شجعو يقوم بالجريمة البشعة 

قدام السكات د اليك وعدم تراجعو عل الاعتراف للي قدمو ب خصوص قتلو ل عائلة صديقة ف 16juin 2007 اليك كرايدر تم  توقيفه ..

المحققين كانو مصدومين ف هاد القضية   اليك قدر يخدع محققين معروفين بالحنكة ..بعد الجريمة اليك بقى ساكت وهادي ومشى دوز امتحاناتو وحصل على نقط عالية.. وما حرك حتى ساكن

نهار اعترف  لاحظو على ملامحو واحد النوع من الامبالاة والبرود بحال يلا تاحاجة ما عندها اهمية..

وابتداء من داك الساعة المحققين  ارتاحو لانهم وعائلاتهم وباقي افراد المجتمع غادي ينعمو بالراحة.. وقالو ان هاد المراهق هو واحد من القتلة المتسلسلين, للي لولا  انه تكتاشف امرو ل بقى حر طليق وعمرو ما غيتوقف على القتل

وهاذ القتلة المتسلسلين او مايسمى ب  serial killer نوع من الناس تيقتلو ثلاثة أشخاص أو كثر، على مدى فترة من الزمن وتتكون عندهم فجوات زمنية بين عملية قتل و اخرى واللي تقدر تتراوح من بضعة أيام إلى شهور أو إلى سنوات عديدة. والقتل عندهم  تيشبع ليهم  رغبات نفسية غير طبيعية..

 هاد  الهوس د القتل للي عند اليك القاتل المتسلسل   تيشكل وحدو الدافع لاقتراف جرائم بشعة    هو متعطش للقتل وخصو يقتل  كان باغي يجرب  اش من احساس واش من تاثير غ يحدث عندو لو انه قتل  وقال بينو وبين نفسو  علاش ما يجربش   على اعز اصدقاؤه وهاكا مشى بكل برودة دم وذبح عائلة ب اكملها ب دون شفقة او رحمة... كان ب هاذ الفعل باغي غ يجرب شحال غادي يعطيه هاذ القتل ديال المتعة واش قل او كثر من داكشي للي كان تيتصور؟

مع كل هذا , اليك ووالديه مازال عندهم امل انه يفلت من الاعدام ب فظل التقييم النفسي ..ولكن هاد الرغبة عمرها ما غتحقق لان اليك ماشي خارج على عقلو بالعكس هو تصرف ب متعة و ف هدوء بمعنى ,لما قام بالجريمة دارها وهو ف كامل قواه العقلية وبالتالي فهو مسؤول على افعاله بلا ما نساو الدلائل للي تبتات ف حقو الجريمة والاعتراف كذلك مابقى عندو حتى فرصة باش يمنع من المحاسبة..

 ولهاذا تم الاعلان على انه مسؤول عقليا ونفسيا على افعاله.. من طرف القاضي للي  ما اتخدش سن 16 سنة مبرر ل تبرأته من الجريمة 

ف 17 سنة تحاكم بحالو بحال اي انسان بالغ نظرا للجريمة البشعة للي دار ..ولو انه تحاكم كمراهق كن دخل ل اصلاحية وغادي يعاود يخرج من السجن وهو ف سن البالغين ويستمر ف الجرائم ديالو ..والقضاة شافو ف اليك واحد الشخص خطير ل درجة انه ما خصهمش يحاكموه كقاصر باش مايستفدش من الحرية لما يصبح بالغ..

اليك نظرا للادلة والاعتراف للي قدم ونظرا ل كونو ارتكب الجريمة وهو ف كامل قواه العقلية  الفريق النفسي والمحققين والقضاة اعتبروه انسان مسؤول على افعاله وبالتالي ما بقات عندو حتى وسيلة تخفيف  ..

وهد شي علاش ف ولايات كثيرة ف امريكا القانون سمح ب محاكمة شبان ف 13 سنة بحال بالغين باش يسدو الطريق عل الاجرام اللي تيقومو به القاصرين.. ف حق المجتمع..           

 

عائلة حكايا وصلنا ل نهاية حكايتنا اليوم تنتمنى تكون نالت اعجابكم  وتنتمنى تفاعلو مع الفيديو بشكل ايجابي شجعوني بالمشاهدة و بالليك والكومونطير والاشتراك ف القناة باش نعطي افضل ما عندي 

ودمتم سالمين