اختفاء عائلة ف ظروف غامضة

اختفاء عائلة في ظروف غامضة

القصة بدات احداثها  لما كانو   رجال  الوقاية المدنية ف أحد المنتزهات  الوطنية الغابوية ف استراليا تيحرقو الاعشاب اليابسة للي ف جوانب الغابة باش يقللو من فرص نشوء الحرائق التلقائية او المتعمدة .. واحد الساعة وهما يلقاو حقيبة  قديمة  بدات النار تتحرقها ..خبرو السلطات ..جاو المحققين ..فتحو الحقيبة كان من ضمن  الاشياء للي وجدو  فيها :  1الكيس د  البلاستيك  بيض  ف الجنب د الحقيبة و فيه شيء حاجة قدرو يعرفو انها جمجمة د طفل صغير ..

بداو تيصورو الحقيبة من جميع الجهات باش يحصلو على  صورة واضحة  ..وهنا لاحظو انه ماكاينش غ داك الحقيبة وانما كاين  حقيبة اخرى اكبر منها وهاد الحقيبة على خلاف الاولى ما تحرقاتش حيت النار كانت مازال ما وصلتها..

المحققين  قدرو   المسافة للي كانت بين الحقائب ب زوج  ولاحظو انها صغيرة , داك الساعة قالو مادام المسافة للي تتفصل مابين الحقائب بزوج صغيرة , بدون شك غ يكون بينهم شي صلة وتمناو انهم مايوجدوش ف الحقيبة الثانية بحال شي للي لقاوه ف الاولى ..

 المحققين حولو الحقائب بزوج ب حذر من اجل الفحص الدقيق ل محتوياتها و فتحو الحقيبة الثانية  باش يفرغوها وهنا كانت المفاجئة الصادمة :وجدو  بقايا جسد امراة ..

 المحققين تصدمو حيت ماكانوش متوقعين  يوجدو هادشي ف هما يالله لقاو بقايا طفل والان لقاو راسهم قدام مستجد مرعب..

 لما  دققو النظر ف الجسد د المراة لقاو حول الراس ديالها حتى هي بلاستيك  تيشبه ل هداك للي وجدو على الجمجمة د الطفل ف الحقيبة الاولى 

المحققين استمرو ف التدقيق ف جثة المرأة  لاحظو ان يديها كانو معقودين ب حبل تينزل من الظهر حتى للرجلين للي تعقدو ب شكل متين.شي للي جعل الجسد محاصر تماما ....

فريق البحت رجع مرة اخرى يقلب الحقيبة الصغيرة للي وجدو ف الاول ....وهنا لما بداو تيفرغوها من محتوياتها وجدو ملابس  مطوية ب عناية , وبداو تيخرجو دوك الملابس واحد واحد  باش يرتبوهم ....فجأة وجدو واحد الكيس د البلاصتيك فيه جمجمة اخرى؟   وهاكا غ يكون هاداك هو الكيس الثالث والجمجمة الثالثة ... للي وجدو ؟؟

المحققين صدمهم هاد الاكتشاف وبقاو شي تيشوف ف شي مستغربين ...حيت الامر كان قاسي عليهم لما لقاو اول طفل  ولكن باش يلقاو زوج اجساد صغيرة مروبطة من الرجلين ,والريوس  ملفوفين ب كيس بلاستيك ل كل واحد... ؟هذا هو شي للي اثر فيهم  بزاف..

ف 27 غشت 1997 تم الاعلان رسميا عل اكتشاف 3 د الجماجم بشرية وثلاتة د الجثث ف احد الغابات ف استراليا... ولكن ما استاطعوش يحددو  فترة وقوع الحادث بالضبط ولا يحددو الهوية د الضحايا..

من بعد هاد الاكتشاف المرعب ,المحققين فتحو صفحة د البحث عن الاشخاص المفقودين باش يعرفو هوية الضحايا للي تم العثور عليهم 11 km جنوب منطقة اسمها si snocks ف استراليا

جنس الضحايا و اسباب الوفاة  مازالو مجهولين.. الصحافة المحلية تظن ان جثة الشخص البالغ للي وجدو تقدر تكون د انثى  تم الاعلان عن اختفاءها ف المنطقة قبل عدة شهور

ولكن ف انتظار ما المحققين يتأكدو من هاد الفرضية. الطبيب الشرعي قام ب تشريح للجثث الثلاث على امل انه يقدر يحدد اسباب الوفاة ..

استعملو اشعة x  ولكن الاشعة ما بينات حتى شي اثر د العنف على العظم بالتحديد ..ماوجدو لا كسور ولا جروح بالرصاص.. و ما وجدو حتى شيء  تيدل  على عنف اثناء القتل.. و العظام كانت سليمة ..

وسط الحقائب ما وجدو حتى شي اداة د الجريمة وبالتالي ماقدوش يحددو سبب الوفاة ..

وأمام هاد الغموض ,  رجعو من جديد يدققو البحث ف اكياس البلاستيك للي وجدوها مغطيا الجماجم :داك الساعة قالو كاين احتمال ان الضحايا تخنقو حتى للموت ب داك الاكياس... هاد الاحتمال ,  اثر بزاف على المحققين ...

من بعد ,حاولو كل ما ف وسعهم باش يتعرفو على الضحايا بواسطة الوسائل القليلة للي مابين يديهم و بداو تيتساؤلو واش كانت شي مرا ووليذاتها اختفاو هاد السنين الاخيرة ولكن ما دكرو حتى حد ولهذا اعتاقدو ان الضحية وولادها ربما ماشي من المنطقة ...

المحققين انكبو عل  عشرات القضايا الشبيهة ب هاد القضية ..ف الاخير ركزو على قضية د سيدة اختفات هي و زوج من اطفالها السنة الماضية ...عشرة اشهر قبل ما يتكتاشف امر هاذ الجريمة ...سيدة اسمها مينا بارك تقدمات عند البوليس  تتقول انها اخت زوج الضحية سوزان بارك 31 ans واولادها ب زوج  اندرو  18 شهر و امي 3 سنوات تيسكنو ف نواحي د sydney..ختافاو هادي مدة..

المحققين تيتمناو  ان اللقاء مع مينا تكون عندو قيمة مضافة للقضية من خلال المساعدة على كشف طلاسم الجريمة ب طريقة ما  والتعرف عل الجثث ب ثلاته..

ف مركز الشرطة وراوها المحققين  صور وملابس وجدوهم مع الجثث  تتخص الضحايا وبغاوها تقول لهم واش سبق لها شافتهم...بداو  ب واحد اللبسة حمرا ,تعرفات عليها وقالت لهم انها لبسة د سوزان كانت عزيزة عليها  وعندها صور د سوزان  كانت لابسة داك اللبسة.. تعرفات ايضا على الدبدوب قالت لهم كان هدية د عيد الميلاد د andrewمن جداتو د باباه للي هي ام مينة

 المحققين وراوها  halaka ,خبراتهم انها شافت suzanne لابساها ف واحد النهار لما كانو ف محل للتسوق وهاد شي كان ش خمسة د الاسابيع قبل الاختفاء ديالها هي والاطفال..

الان ومن بعد ما dlat مينا ب هاد الشهادات عطات  للبوليس الاسترالي خيط متين خلاهم يعرفو الهوية د الضحايا الثلاث..وما بقا عليهم غ يتاصلو ب  عائلتها ..ولكن وقبل مايتاصلو المحققين ب اقرب الناس ل سوزان للي هو الزوج للي هو  الاخ د مينا الشاهدة ,بلغ ل علمهم من طرف مينا  ان سوزان كانت منفاصلة على زوجها وهذا ما منعهمش باش يبقاو على صلة ب سبب لوليدات للي كان تيجي يطمئن عليهم كل اسبوع او اسبوعين

المحققين مشاو ل بيت سوزان ,وجدو زوجها nick  للي فتح لهم الباب  وعلى وجهو ابتسامة عريضة  وحفاوة استقبال ..ولما سولوه على سوزان ولوليدات قال لهم انهم ف queensland عند عمها ف منطقة brisbane..خبرهم انه مشغول ب جمع اغراضهم للي بغا يبيع  باش ينتاقلو للعيش ف  brisbane..

المحققين بان لهم كلامو عادي وهذا طمأنهم  ودعوه على اساس يعاودو يرجعو عندو من بعد  ل مزيد من التحقق وهو من جيهتو ما عطاهم حتى انطباع بانه مضطارب او خايف كان تيتعامل ب طلاقة مبتاسم بحال يلا ماكاين حتى باس ..واكد عليهم انه باقي ف البيت من اجل جمع الاغراض ..

المحققين ما كانوش بالسذاجة للي تيتوقع nik ف هما دارو دورة كبببييرة ومشاو حتى ل عند العم د سوزان للي قال لهم ان الزوجة ولوليدات مشاو عندو   .

عم سوزان تعجب لما سولوه المحققين على سوزان ولوليدات ,قال لهم انه ما عندو عليهم حتى اخبار اكثر من 6 د الشهور...الامن والمحققين جاتهم غريبة هاد الدورة للي دار بيهم nikع لاش كذب عليهم؟ داك الساعة رجعو ل عندو من جديد وهما عندهم المعطيات جديدة باش يواجهوه ..

صناو حتى عياو ولكن ما من مجيب .. هنا قرر فريق البحت يستطلع الامر عند الجيران  لعلهم يفيدوهم ب خصوص اختفاء ربة البيت ولولاد  .

وهنا واحد الجارة خبراتهم انها ماشافتش سوزان اكثر من15 يوم وان اخر ما قالت لها سوزان هو انه كاين احتمال أنها ترجع  تعيش هي وزوجها...

الاستماع ل اخت نيك عطى للمحققين معلومات كثيرة على الحياة  الشخصية ذ الاسرة د نيك وسوزان  : خبراتهم انه من بعد ما نيك  كانت عندو علاقة مع امراة اخرى  استامرات 11 شهر ومن غير علم سوزان.. خبراتهم ان نيك لما خاف سوزان تكتشف الامر ب سبب غيابو  عل البيت, وباش يبرر الغياب ديالو,قال لها انه تيشتاغل ف الليل وتيبقى عند واحد من الاصدقاء  ..

نيك ما قالش ل سوزان انه عندو علاقة مع امراة اخرى  و عايش معاها..بقى الامر ف السر حتى ل  سبتمبر 1996م شهر قبل اختفاء الزوجة والاطفال..

 لما عرفات سوزان ان نيك عندو علاقة مع امراة اخرى دارت محاولة انتحار عن طريق شرب كمية كبيرة د الخمر ..من بعد نصف ساعة من محاولة الانتحار سوزان عيطات ل مينة  شي للي خلاها تمشي على وجه السرعة للبيت تطمئن عليها وعلى الاطفال...

من بعد هاد الحوار مع اخت نيك والنتائج للي وصلو ليها,  توضحات امور كثيرة ف القضية..

 المحققين مشاو بعيد ف احتمالاتهم  ل درجة انهم شكو تكون  سوزان فقدات الامل ف علاقتها مع زوجها ,و  دارت محاولة انتحار فاشلة  و من بعد  قتلات اولادها ثم قتلات نفسها؟  

ولكن اكتشاف الجثث ب ثلاته ف حقائب ,  وضع نهاية ل هاد الاحتمالات ..الحقيقة للي تكتاشفات هي ان سوزان و وليداتها تقتلو ب دم بارد...

فريق البحث  طرح على مينا اخت نيك اسئلة منها واش تظني ان المافيا الكورية كان عندها مبررات ل قتل سوزان واطفالها؟

مينا بعدات عل السؤال  ومشات مباشرة للحديث على ان سوزان شهر من بعد اكتشافها حقيقة زوجها  كانت  مكتائبة وكانت ك ما تنقولو  مغزفا على صديقة زوجها نيك ..مشات مرات كثيرة للبيت عندهم وكانت بينهم صراعات...

ولهاذا من غير صديقة نيك  للي كانت الامور معاها قبيحة بزاف وكانت غايرا منها  حتى حد مايبغي يقتلها حيت كانت لطيفة  وعمرها ما دابزات مع شي حد ... المحققين  شكو ف بزاف د الناس  للي ممكن يكونو عن القتلة د سوزان  والاطفال ...

* صديقة نيك  الغيورة..

*الام د نيك  شكو  تكون عندها يد ف الفاجعة حيت سوزان ونيك تزوجو هادي اربع سنوات ,وام نيك عرفات ان سوزان من جنسية صينية و لهذا كانت معارضة هاذ الزواج ...لكن لما كبرو لوليدات ولاو عزاز عليها . وهاكا تخلات على فكرة رفضها ل زواج ولدها من سوزان وهاكا  المحققين استبعدوها من لائحة المشتبه بهم ..

*نيك حتى هو كان ف لاىحة المشتبه بهم لانه كان معروف ب لعب القمار وتناول الخمور  والمخدرات وتيقضي معظم وقتو ف الكازنو .. شكو ف سلوكه هذا يكون ب هدف التغطية على شي حاجة ناقصاه  او تيعاني منها ..

المحققين وصل ل علمهم  ان داك الكازنو فتح الابواب ديالو سنة قبل الاختفاء د عائلة نيك و تعرف ب مجموعة د الرجال  هم افراد من المافيا الكورية للي تيسلفو   المال للمقامر ين...

 معروف على هاد الناس انهم عنيفين والدليل ان  كاميرات الشوارع  و الازقة تتسجل صور بشعة  للتعنيف والضرب والجرح  للي تيقومو به هاد الافراد  ..

 السلطات بغات توقف مسالة السلف للي تيتعطى للمقامرين من طرف المافيا الكورية وللي هو من اهم نشاطاتها  لان ظاهرة دين  القمار تتخلق متاعب للكازينوهات و الزبناء ديالها ..  

للعلم , ف هاد الملاهي ,تيتواجدو زوج د العصابات تيتنافسو  من اجل السيطرة عليها وعلى الناس للي تيترددو عليها..هاد العصابات تيمتصو دماء المدمنين عل القمار من خلال نسبة فوائد عالية وف الاخير تيكون مصير كل من عجز عل السداد القتل

المحققين للي مازالين مستمرين ف الاستماع ل اخت نيك  قالو لها انه لما اختفات سوزان و وليداتها ,الخبر للي صبح  رائج ف الصحافة  هو ان المافيا الكوريا تقدر تكون خطفاتها .. وسولوها واش ممكن المافيا تقدر تهاجم سوزان  و ولادها؟

قالت لهم ..ربما يكونو تيسالو للاخ ديالها المال  ؟..كلشي ممكن ف الاخ ديالها عمرو ما تكلم على هاد شي .وللي كانت كتعرفو هو ان نيك  عندو مشاكل  مالية..وكان بزاف د المرات تيطلب منها المال ومن امها ومن صحابو وخبراتهم انو كان تيمشي وحدو للكازينو من اجل اللعب..

لما المحققين عرفو  ان نيك تيمشي للكازينو  مع العلم انو عندو مشاكل مادية ,بداو تيتساءلو واش خلال اللعب  ضطر يتسلف من افراد داك العصابات؟وتساءلو واش العصابات قتلو عائلتو انتقاما منو لما عجز على تسديد الدين؟ هاذ  التساؤلات هي مجرد فرضيات حتى دليل ل حد الساعة ما تيتبتها او ينفيها...ولهذا تبعو  هاذ الخيط ..  ولكن لقاو راسهم تيجهلو طريقة عمل شبكة  العصابات الكورية  ..  ومن اجل الحصول على المعلومات الازمة  باش يبداو البحث المعمق  كان لازم يطلبو المساعدة من  البوليس الدولي او الانتربول.. للي خبرهم ان بعض افراد العصابات لما تيسلفو المال للمقامرين وتيعجزو يردوها تيفرضو عليهم يخدمو زوجاتهم وصديقاتهم او بناتهم  ف المعامل السرية  او المنازل او يخدموهم ف الدعارة..

رجال الامن بغاو يستنطقو nick ب هاد الخصوص باش يعرفو حقيقة الامر ولكن لما مشاو للبيت للي تيعيش فيه مع  صديقته ما لقاو حتى حد ولهاذا قلقهم هاذ الامر ودارو مبادرة مهمة لما طلبو من بوليس د الحدود يخبروهم يلا جا nick للمطار باش يخرج من البلاد ..غ شوية وسي nick  يبان هو و صديقتو و ف نفس الوقت   توصلو ب مكالمة من طرف الجمارك تتخبروهم ان نيك تيحاول يغادر البلاد  هو و واحد المرا..

 ..لكن ولسوء الحظ ماقدروش يوقفوه حيت كانو مازال ما وجدوش الجثث ولهذا طلبو من العملاء الفدراليين يطلعو للطائرة يستنطقوه مرة اخرى ب خصوص اختفاء الزوجة والاطفال ب زوج

قال لهم هو مسافر ل كوريا يزور احد الوالدين مريض وان عائلتو الصغيرة كاينة ف كوينز لاند وغ يرجع ل سيدني من بعد 10 ايام ..

 العملاء الفيدراليين مافوتوش الفرصة باش يقلبو l billet  للي  شرا ويدققو فيه النظر وهنا بان لهم ان خونا nick مقطع billetغ ذهاب بمعنى انه ما نويش يرجع ل استراليا ههه داير مشيا بلا رجعا

العملاء الفيدراليين ما كان عندهم حتى حاجة ضدو وبالتالي خلاوه يمشي...هاد الملاحظة للي دارها الانتر بول خلات المحققين الاستراليين يشكو ان كاين شي سر عند nick خلاه يحاول يهرب من استراليا ..

 ولهذا تم نشر مذكرة بحث على nick عبر العالم  ب واسطة الانتربول وهو الان مبحوث عليه من طرف الفرقة الاجرامية الاسترالية..وتبين اخيرا ان نيك تورط ف ديون مع المافيا ..المحللين وضعو زوج د الفرضيات على اختفاء سوزان والاطفال :الاول كاين احتمال ان نيك قتل عائلتو والاحتمال الثاني المافيا الكورية اختاطفات سوزان  ضد الارادة ديالها باش تستغلها ف تسديد ديون نيك  اما عن طريق العمل ف اماكن سرية وغيرمرخصة او  استغلالها ف الدعارة  او تيتم بيعها و طلب فدية مقابل الدين, أو اختطاف الاطفال..

المحققين  استدعاو احد افراد عائلةnick  للي هي اخته اسمها مينا ..استمرو ف الاستماع ل لها ب خصوص موضوع اختفاء سوزان واطفالها وعلاقة الاخ ديالها ب موضوع الاختفاء..وهنا:سولوها واش سوزان عمرها تعاطات للدعارة ؟ لكن مينا نفات هاذ الاحتمال وبررات جوابها ب كون سوزان سبق لها احتاجت مبلغ من المال   قدرو 12الف اورو باش تجي لاستراليا كانت تسلفاتو من عمها وخدمات ليل ونهار  ف المطاعم باش  تردو ليه ..

mina خبراتهم ان زوجة الاخ ديالها عمرهاما تورطات ف امور غير قانونية ..وخبراتهم ان سوزان ماكانتش غ تورط  مع القانون ولو من اجل دفع ديون زوجها ..

المحققين طلبو المساعدة د المكتب المركزي ل مقاومة الجريمة المنظمة, لانو هو للي مهتم  بالمافيا الاسيوية ..بحثو ف البيوت المغلقة دسيدني وهما حاملين صور سوزان و ولادها لعلهم يوجدوهم ولكن ماوجدو والو ..

 ف هاد المرحلةمن التحقيق المحققين  حاولو يستغلو كل الخيوط للي بانت لهم ولكن خيط المافيا بان لهم غيوصلهم ل طريق مسدود وهاكا رجعو خطوة للوراء وركزو تفكيرهم على اب الاسرة نيك وضعو فرضية ان نيك هو القاتل وطلبو مذكرة تفتيش  لبيت نيك .لاحظو ان البيت ماتغيرات فيه حتى حاجة على اخر مرة دخلو ليه ..ماكاين  اغطية د الاسرة ’ الخزائن كانت فارغة والحاجيات  الاخرى كلها مجموعة كما لو ان نيك كان تيستعد للانتقال ل بيت اخر وكان واضح انه ماعاودش دخل ل بيته من اخر نهار شافوه المحققين فيه وتكلمو معاه..

قلبو على اثار د المقاومة او العنف  اواثار دم ف البيت كلو ولكن ماوجدوحتى شي حاجة ..وعاودو رجعو للبيت للي كان تيسكن فيه نيك مع صدقتو ولكن حتى تما ما لاحظو حتى حاجة غريبة .

المحققين دازو ل خطوة اخرى تتعتبر تلقائية  تتدار عادة ف التحقيق لما تيتعلق الامر ب اختفاء شي حد الا وهي البحث ف الحسابات البنكية د المختفي: وهنا بان واحد الخيط تمسكو به المحققين لما لاحظو ان  عملية سحب  دارت اسبوع من بعد اختفاء سوزان زوجةnick للي ختفات ..

لما دققو النظر ف الوضعية المادية ل اسرة نيك ..البوليس اكتاشفو ان مبلغ 180اورو تسحبات من حساب سوزان اسبوع من بعد اختفائها هي والاولاد .. و لاحظو  ايضا اختفاء 230 اورو من دفتر توفير د الاطفال..وهاد العملية للي دارت خلات المحققين يشكو ان سوزان ساعة السحب كانت على قيد الحياة ,وبداو تيتساءلو.. علاش سوزان كلفات نفسها عناء الذهاب ل وكالة بنكية بعيدة على البيت من اجل السحب مع العلم ان المنطقة للي سحبات منها هي achfield للي تتسكن فيها صديقة نيك وهي بعيدة على مكان السكنى ديال سوزان?

هنا... بان لهم  هاد السلوك د سوزان غريب.. ولهذا المرحلة الموالية ف التحقيق ركزو على البحث ف الوكالة البنكية للي تسحبات منها داك المبالغ ب حيث طلبو تسجيلات كامرات المراقبة باش يعرفو شكون سحب م ن حسابها واش هي أو حد اخر ؟

ف الوقت للي كانو المحققين تيراجعو تسجيلات كامرات البنك , توصلو ب مكالمة من جارت سوزان قالت لهم انها تذكرات واحد المسالة : نهار جا نيك ل بيتو باش يبيع لها ش فراش بان لها تيرمي  شي اوراق ف حاوية القمامة..فضولها دفعها  تاخذ لوراق.و لما قلباتهم عرفات انهم وراق  جاوه من وكالة ل كراء السيارات.. وهاكا عرفو المحققين ان نيك كرى سيارة  زوج د الايام من بعد اختفاء سوزان ..البوليس تبعو هاد المعلومة ومشاو عند صاجب وكالة كراء السيارات للي خبرهم ان نيك ما ردش السيارة ف الوقت المتفق عليه  وخبرهم  ايضا ان نيك كانت معاه امراة  من اصل اسيوي ولما وراه صورة سوزان , اكد لو انها هي للي كانت معاه..ف هاد الحالة , الحماس دفع المحققين يقلبو على السيارة باش يعرفو شكون ركب فيها  ويقلبو عل البصمات و ادلة اخرى وبغاو باش يعرفو واش السيارة تم استعمالها ف نقل الجثث ولا تم استعمالها ل نقل سوزان والاطفال ف مكان امن؟ ولكن السيارة للي كراها نيك قبل ما يسافر خلاها ف المطار ..و دخلوها للفوريان ..بدا البحث ف السيارة لعلهم يلقاو اي خيط يوصلهم لهوية الناس للي ركبو فيها  مثل الشعر ,اثار دم  او اي دليل من الادلة للي يوجههم ل شي لي وقع.. ولكن للاسف ما توصلو ل حتى دليل يثبت ان سوزان ولوليدات ركبو ف السيارة..

وهاكا المحققين مرة اخرى  تصابو ب خيبة امل لان مسالة السيارة كانت اخر باب تفتح قدامهم.. داك الساعة ظنو ان نيك استعمل السيارة باش يدي عائلتو بعيد على سيدني وتماظنو انهم تصابو ب اذى ..

المحققين رجعو مرة اخرى للبحث الدقيق ف الاشياء للي ف الحقائب وهاد المرة البحث تدار على  الاكياس البلاستيكية للي وجدو حول الراس د الضحايا الثلاث .. بداو تيتساءلو واش داك الاكياس تقدر توصلهم ل علامة صانع او مكان البيع ؟

  و بالفعل وجدو ان الاكياس مشرية من  محل makuhari ف mark fields..

لما شاف التاجر صورة سوزان خبرهم انها تتردد عل المحل.. وهاذ الشهادة خلاتهم يتاكدو ان الزوجة والاطفال تقتلو ف بيت  العائلة

ولكن باش يتبتو تورط نيك ف الجريمة  خصهم  المزيد من البحث باش  يربطو مابين الملابس للي تلقاو ف الحقائب و مكان وجودهم..

 وهنا نرجعوا للحظة للي  رجال المطافىء لقاو الحقائب جنب الطريق  ف واحد المزبلة داك الساعة  لاحظو وجود اثار عجلات  ف جنب الطريق ..الارض عادة تتكون ناشفة ف داك الفترة من السنة وهذا تيعني انهم كانو  تما قبل الصيف ..وباش يعرفو واش هاد العجلات تيشبهو  ل عجلات  السيارة للي رمات الحقائب ف داك المكان..كان خصهم يرجعو مرة اخرى للسيارة للي خلا نيك ف المطار  وتوضعات ف الفوريان..

للاسف مرة اخرى لقاو راسهم  قدام مشكلة اخرى :العجلات ما تيشبهوش للاثار للي لقاو جنب الطريق..

وهناك امر اخر..ماكاين حتى دليل على ان الحقائب بقات واحد المدة ف كوفر السيارة..حيت  الحقائب ما تركو حتى دليل داخل السيارة يسهل عليهم اتهام نيك..

مرة اخرى رجعو ل وكالة كراء السيارات باش يعاودو يقلبو السيارات.. استغلو الفرصة وعرضو عل المسؤول 16صور لنساء اسيويات وهاذ المرة كانت المفاجاة المسؤول تعرف على صديقة نيك ديمي ماشي سوزان معنى هاذا انه ف المرة الاولى اخطا لما تعرف على صورة سوزان

المحققين ما تفاجؤوش لما عرفو ان ديمي هي للي كانت معاه ولكن للي بغاو يعرفو  هو واش ديمي كان ف علمها  اش غ يدير  نيك بالسيارة؟

وهاكا ضنو ا ن ديمي ماشي متورطة مباشرة  فاختفاء عائلة نيك ..وكانو  تيضنو ان ديمي تقدرتكون شافت شي حاجة ا و نيك يقدر يكون قال لها شي حاجة للي تقدر تساعدهم ...

كامرات المراقبة ف البنك بينات  ان ديمي كانت معاه نهار سحب 180 اورو من حساب سوزان  وحساب الاطفال  ايام قبل اختفاء العائلة  ديالو .. مع العلم ان سوزان كانت الوحيدة للي عندها الحق ف السحب من حساب الاطفال

ولهذا قام مختص ف الخط بالبحث ف مدى صحة  انتماء الخط ل سوزان وتم ارسال وصل السحب ل مختبر الطب الشرعي من اجل البحث على adn ..هاد الاختبار بين ان البصمات ماشي ديال ديمي .وانما كانت ديال نيك وقدرو يعرفو  أنها ديالو حيت قارنوهم ببصمات الملف للي ف قاعدة البيانات   حيت لما كان صغير توقف ب سبب قضية تزوير..وهادا تيدل ان نيك  هو للي سد حسابات الاطفال اليومين التاليين للموت البوليس اكتاشفو انه ف نفس الفترة نيك باع  جزء من الفراش وخلى  الباقي عند واحد الشخص  مسلفو لفلوس ..هنا بداو المحققين تيتسائلو واش ممكن يكون نيك قتل امراتو وولادو من اجل المال؟ويلا كان هو للي قتلهم ف شنا هو السبب؟

للي معروف انه ف هاد النوع  من القضايا تتطرح بزاف د الاحتمالات  ومنها انه ربما كان باغي يرتبط بديمي وقرر يتخلص من مراتو .. الحادث اثر فيهم  وما صدقوش ا ن اب يضحي ب زوج د لوليدات واحد ف 3سنين ولاخر ف 18 شهر مع انه كان ممكن يهجر استراليا بلا ما يأدي سوزان والاطفال؟

دائماا ف اطار التساؤلات كانو تيقولو انه ضروري تكون وقعات شي حاجة حركات عند نيك داك العنف...وهنا رجعو للمحاولة للي دارت سوزان باش تنتحر

سوزان بقات ف المستشفى شي ايام ف قسم الامراض النفسية من بعد ما كشف عليها طبيب نفسي,  نصحها تكون حذرة وتنتابه ل نفسها و للاطفال..و دفعها تطلب المساعدة  من المصالح الاجتماعية باش نيك يعطيها مصاريف لها و الاولاد ..

المصالح الاجتماعية راسلاتو ب هاذ الخصوص  على عنوانو ف أشفيلد يوم 16 اكتوبر ف الوقت للي كانت عندو مشاكل مادية..امام هاد المستجد  المحققين ظنو ان هذا هو سبب الهيجان  والعنف للي وصل ليه ضد سوزان والاولاد

على الرغم من ان كل هاذ الادلة ما كانتش مباشرة إلا انهم , اعتابروها  ادلة  كافية باش يتهمو نيك بالقتل ويجيبوه من كوريا ل استراليا و يحاكموه...ولكن , واش غ يقدرو يلقاوه

من بعد ما مر عام  و7 د الشهور على اختفاء سوزان والاولاد تم استقدام نيك ل استراليا من اجل المحاكمة ...بداو المحققين تيطرحو عليه الاسئلة ب خصوص موت الزوجة والاولاد ولكن  نيك رفض يجاوب على الاسئلة لان المحامي قال لو ما يجاوب عل الاسئلة ... على خلاف  ديمي الصديقة ديالو  للي كانت متعاونة مع البوليس ..و قالت لهم انه لما توصل نيك برسالة من الشؤون الاجتماعية تتطالبو فيها سوزان بمصاريف الاطفال و مصاريفها  غضب ب شكل خلاه يفقد اعصابو ومشى ل بيت سوزان ف ايستوود

وف 3 او 4 د صباح عيط لها وقال لها ان الامور على ما يرام..ورجع ف الصباح ل أشفيلد عند ديمي و مشات معاه للبنك باش يسد حساب اولاده وخلا بصمة الاصابع على التوصيل ..ديمي اعترفات انها كانت معاه لما كرى السيارة ف اليوم الموالي.

قالت انهم مشاو ل بيت سوزان ف منتصف الليل... نيك دخل عند سوزان وهي بقات تسناه ف السيارة 

ورجع ب 2 د الشانطات دارهم ف الكوفر ومشى ل شمال سيدني ف طريق غابوية  ما عارفاهاش ..نزل ورمى 2 شانطات وسط الاشجار ورجع ل سيدني

ديمي اعتارفات انها مشات معاه للبنك وهي للي قلدات التوقيع د سوزان تحت الطلب د نيك وسحبات 180 اورو .

نيك اذن قتل عائلتو ب دم بارد  وزاد على  مدخرات الابناء  للي هي 180اوروالمبالغ الاخرى باش باع فراش الدار .. وقرر يهرب  ل كوريا ولكن ديمي قالت لهم انه عوض ما يشري les billets لعب بهم القمر ف الكازينو

 المحققين تيظنو ان نيك قتل مراتو والاطفال باش ما يعطيهمش المصاريف  وباش يستولي على فلوسهم للي ف البنك

وهكا المحققين عرضو على ديمي باش تتقدم كشاهدة ف القضية  مقابل سحب المتابعة ف حقها ب خصوص  الاستعمال الخاطئ د الحساب  د سوزان على الرغم من ان البوليس ما قدوش يوعدوها ب تبرءتها من احتمال مشاركتها ف القتل ديمي قبلات ترجع لاستراليا عن طيب خاطر وتحضر قدام المحكمة

المحققين كانو تيشوفو ان مجرد الرغبة ديالها ف الرجوع  ل استراليا والشهادة ضد نيك هادا دليل على انها ما شي طرف ف الجريمة وما غ تكون حتى متابعة ف حق ديمي للي رجعات تعيش ف كوريا شهادة ديمي ف حق نيك كانت سبب ف اتهامه  ب جريمة قتل الزوجة والاطفال ولهذا نيك , ترحل ,تحاكم ,وتسجن 26سنة 

ونظرا ل بشاعة هاد  الجريمة المحققين تمناو ل نيك   من القلب يتحرق ف جهنم وتمناو لو انهم قدرو يعرفو السبب  الحقيقي للي خلاه يقوم ب عملية ابادة ل عائلتو ب دم بارد  ..

 وباش يحلو هاد اللغر المحققين لجِؤو ل علماء النفس و المختصين ف علم الجريمة وعطاوهم احصائيات   جاء فيها ان القتل تيقومو به  الرجال  .الرجال حسب التصنيفات للي  قامو بها البوليس تتمثل 85%ل 90% ..وهاد الرجال بالغين شباب عمرهم  ما بين 18 و 35 سنة وهاد الشريحة هي الكبيرة

اما القتل للي تيتورطو فيه القاصرين فالشريحة للي تتمثلو ناذرة وكذلك القتل للي تيتسببو فيه الاشخاص للي فوق الخمسين  قليل اكثر وعليه فالمختصين تيصنفو القتل ل فئات كثيرة منهاجرائم القتل المنزلي أو العاطفي ..القتل العمد..جرائم القتل المرتبطة بجرايم اخرى بحال  الاغتصاب اوالسرقة تصفية الحسابات بين الخارجين عل القانون..القتل غير المبرر أو قتل ..للي تيرتاكبوا مرض عقلي

نتوقفو عند فئة القتل العائلي التي تتهمنا وللي تدخل فيها قضية عائلة نيك بارك .. هاد القضية تتمثل 1/5 حوادث القتل للي تتوقع ف الولايات المتحدة الخلافات الزوجية تيكون سببها ف اغلب الاحيان الانفصال الخيانة, الفشل الاقتصادي للاسرة 

 الشخص البالغ للي تيقوم بالجريمة هو شخص عاش ف ظروف قاسية مثلا كان بعيد عل الوالدين ب سبب طلاق او موت 

او تربى ف جو  اسري عنيف نفسيا و جسديا

السؤال هو :واش نيك بارك تعرض ف الصغر  للضرب واش كان طفل متخلى عنو واش تعرض للاستغلال الشي للي خلاه يتحول ل وحش بشري.؟ هذا هو شي للي ماتنعرفوهش لاننا ما نقدروش نفهمو خبايا النفس البشرية وبالتالي ما نقدروش نتوقعو ردود افعالها..